Luk 18:31-34 | YomNWM | STEP | Yesu wunata kumi ayi mimvuala miodi ayi wuba kamba : —Tala, tueka kuenda ku Yelusalemi ayi mambu moso masonika mimbikudi mu diambu di Muana Mutu meka sunduka.

Luke 18:31-34

Yesu wuyolukila diaka lufua luandi ayi mfulukulu andi.

(Matayi 20.17-19 ; Malako 10.32-34)

31 Yesu wunata kumi ayi mimvuala miodi ayi wuba kamba :

—Tala, tueka kuenda ku Yelusalemi ayi mambu moso masonika mimbikudi mu diambu di Muana Mutu meka sunduka. 32 Bila bela kunyekula mu mioko mi bapakanu, bela kunsekinina, bela kumfinga, bela kunlobudila madita ; 33 ayi bela kunzuba bikoti, bela kumvonda. Bosi wela fuluka mu lumbu kintatu.

34 Minlonguki misia sudika kadi diambu dimosi ko mu mambu moso mana bila tsundu yi mambu momo yiba yisuama kuidi bawu ; ayi misia bakula ko mambu mbi Yesu kaba yolukilanga.